ეს Civic-ი ძალიან მაგარი ტიპია. ამაზე მეტი რადიკალურობა თითქმის წარმოუდგენელია
სიმძაფრე და განსაკუთრებული ხასიათი არც წინამორბედ მოდელს აკლდა. პირიქით, ველური Civic-ი თავისი 8500-ბრუნიანი VTEC-ით თავის კატეგორიაში ნაღდი ჩემპიონი იყო. ერთი ეგ იყო, რომ შიშველი ციფრები ამ მანქანის Performance-დაპირებებს ისე ვეღარ შეესაბამებოდა, როგორც საჭირო გახლდათ. მიუხედავად შედარებით რბილი შესრულებისა, ველური «სივიკის» კონკურენტები ბოლო დროს უფრო სწრაფები გახდნენ, რაც «ჰონდასთვის» ახალ გამოწვევად იქცა - გამოწვევად, რომელსაც იაპონელებმა ახალი Civic Type-R-ით უპასუხეს. თავად ამ ახალი მოდელის გამოწვევა კი ის არის, რომ ეს მანქანა, არც მეტი და, ეშმაკმა დალახვროს, არც ნაკლები, ყველაზე სწრაფი წინაამძრავიანი კომპაქტი უნდა იყოს!
შესაბამისია ის რადიკალურობა, რომელიც იაპონელებმა ახალ მოდელს მიანიჭეს. რადიკალურობაში ვგულისხმობთ როგორც ვიზუალურ (სპოილერები, ცოტა არ იყოს ზედმეტი დაპირების მომცემი 4 მაყუჩი და ა.შ.), ისე ტექნიკურ მხარესაც, რაც ამ მანქანის ტესტირებისას, პირველივე მეტრებზე ვიგრძენით.
მართვით მიღებული ახალი შეგრძნებებიდან, ყველაზე მძაფრი ემოცია წესით სრულიად ახალ, პერსონალურად Type-R-ისთვის შექმნი 4-ცილინდრიან Turbo-ძრავას უნდა გამოეწვია, რომელიც 2500 ბრუნიდან 400-ნიუტონმეტრიან ბრუნის მომენტს ავითარებს, მაგრამ არა - მართალია, ეს ცხადად მაგარი ძრავაა, მაგრამ პირადად მე ყველაზე მეტად სულ სხვა რამ, კერძოდ კი Honda-ს უკომპრომისოდ შესრულებული წინა დაკიდება მომეწონა. ეს გახლავთ ორად გაყოფილი და ამით კიდევ უფრო დაჭიმული და ხისტი დაკიდება წინ - თავისი მექანიკური დიფერენციალით და უახლესი საბურავებით, რომლებიც «ჰონდას» პარტნიორმა Continental-მა შეუქმნა. აქვე უნდა ვახსენოთ ასევე ახალი, ადაპტირებადი სავალი ნაწილიც, რომელიც საბურავებს ცალკეულად მართავს, რათა ზედმეტი მოძრაობები მინიმუმამდე შემცირდეს. და უნდა ვთქვა, რომ ეს სისტემა ძალიან კარგად ფუნქციონირებს!
თუმცა მეორე სიჩქარეში გარკვეული უკმარისობები მაინც იგრძნობა, რაც წინაამძრავიანი სპორტული კოპაქტისთვის დამახასიათებელია, აი, მესამე საფეხურიდან კი «ჰონდა» თავის სიმძლავრეს სრულად აკონტროლებს. გადაცემები ექსტრემალურად მოკლეა, ძრავა ბრუნების ჰორიზონტისკენ (7000) ყოველთვის ბეჯითად მიიწევს და საერთო ჯამში მართლაც თითქმის ისე იქცევა, როგორც ატმოსფერული აგრეგატი. თამამად ვიტყვი, რომ ეს არის ერთ-ერთი საუკეთესო ტურბირებული ძრავა, რომელიც ოდესმე გამიტესტავს და, რაც ასევე მნიშვნელოვანია, ბევრი კონკურენტისგან განსხვავებით, არავინ ზღუდავს - არაფერი ზღუდავს 270 კმ/სთ-მდე! დაუჯერებელია!
ასე რომ, მაღალი ბრუნების მოყვარულ ყველა ენთუზიასტს შეუძლია მშვიდად იყოს: ახალმა Type-R-მა თავისი უმთავრესი ღირებულებებიდან მცირეოდენიც კი არ დაკარგა! პირიქით, უფრო რადიკალური და ველური გახდა. შესაბამისია შედეგიც, რომელიც ამ ავტომობილმა ნიურბურგრინგის ნორდშლაიფეზე აჩვენა - შედეგი, რომელიც წინაამძრავიანებში ახალ რეკორდს ნიშნავს: 7:50,63 წუთი! ცნობისათვის, რეკორდი ბოლოს Renault Mégane R.S. Trophy-R-ს ეკუთვნოდა, რომელმაც «ნორდშლაიფე» ამ «ჰონდაზე» თითქმის 4 წამით გვიან გაიარა.
► Honda Civic Type-R
ძრავა: 4-ცილინდრიანი, Turbo; მოცულობა: 1996 სმ3; სიმძლავრე: 228 კვტ (310 ცხ. ძ.) 6500 ბრ/წთ; ბრუნის მომენტი: 400 ნმ/2500-4500; მაქს. სიჩქარე: 270 კმ/სთ; აჩქარება: 0-100 კმ/სთ: 5,7 წამში; ამძრაობა: წინა/6-საფ. გად. კოლოფი; ავზი: 50 ლ; სიგრძე/სიგანე/სიმაღლე: 4390/1878-2065*/1466 მმ; ბაზა: 2590 მმ; საბარგული: 498-1214 ლ; წონა: 1382 კგ; საწვავის ხარჯი (EU): 7,3 ლ. Super/100 კმ-ზე; გამონაბოლქვი: 170 გ/კმ; ფასი: 34 000 ევრო
წყარო: Auto Bild Georgia
