ატელიე Nismo -მ გაუმჯობესებული Nissan Patrol -ი წარმოადგინა

ატელიე Nismo -მ დუბაიში თავისი სამი პროექტი წარმოადგინა : სპორტკუპე Nissan 370Z Nismo, სპორტქარი Nissan GT-R Nismo და ყველგანმავალი Nissan Patrol Nismo, რომელიც ამ სამეულიდან პირველი გამოვა გაყიდაში.

Nissan Patrol -მა მიიღო Nismo -ს ტრადიციულ ფერებში შესრულებული ახალი წინა და უკანა ბამპერები, ასევე 22 დიუმიანი Rays -ის დისკები, გაუმჯობესებული სავალი ნაწილი და საჭის მართვის სისტემა. სალონში გაჩნდა ტყავის სავარძელი Nismo -ს ლოგოტიპითა და ახალი ხელსაწყოთა პანელი. ყურადღების გარეშე არ დარჩა 5,6 ლიტრი მოცულობის ბენზინის ძრავა, რომლის სიმძლავრეც ატელიეში 405 ცხენის ძალიდან 428 ცხენის ძალამდე გაზარდეს. გაუმჯობესებების ანალოგიურ პაკეტს მიიღებენ Nissan 370Z Nismo და Nissan GT-R Nismo.

                                                                              წყარო: Driver.ge

სრულად »

ყველაფერი მომავალი Mercedes CLC-ს შესახებ

4-კარიანი Mercedes CLC 2020 წელს გამოვა და ამ ავტომობილით ”მერსედესი” CLA-სა და CLS-ს შორის არსებულ სიცარიელეს ამოავსებენ. რაც ყველაზე საინტერესოა, CLC მხოლოდ ეკონომიურ-ეკოლოგიური ჰიბრიდული ამძრაობით კი არ გამოვა, არამედ V8-ძრავითაც იქნება ხელმისაწვდომი.

CLC არ იქნება ორკარიანი სპორტული კუპე. ეს იქნება 4-კარიანი სედანი სადღაც CLA-სა და CLS-ს შორის. თუკი CLA A-კლასის ბაზას იყენებს, CLC C-კლასის ბაზაზე აეწყობა.

”მერსედესს” მყარად აქვს გადაწყვეტილი AMG-მოდელების შექმნაც. CLC 450 Sport ახალი 6-ცილინდრიანი ძრავით აღიჭურვება, რომლის სიმძლავრეც 435 ცხენის ძალაა. ცხადია იქნება ჰიბრიდული და დიზელის ვერსიებიც. აი, CLC 63 AMG-ში კი 4-ლიტრიან V8-ს ვიხილავთ, რომელსაც ავტომობილი AMG GT-სგან მიიღებს (510 ცხენის ძალა).

                                                                      წყარო: Auto Bild Georgia

სრულად »

M4 GTS – ყველაზე სწრაფი საგზაო BMW

BMW სუპერ ავტომობილებს არ აწარმოებს, თუმცა თუ M4 GTS-ის მონცემებს გადავხედავთ, საპირისპიროში დავრწმუნდებით. მერე რა, რომ ჩვეულებრივი საგზაო ავტომობილის ფორმა აცვია. სამაგიეროდ, მის შეზღუდულ ტირაჟზე რომ არაფერი ვთქვათ, სუპერ ავტომობილის გული უძგერს და ტემპერამენტიც რჩეული „ურიკების“ შესაფერისი აქვს. ყველაფერს რომ თავი დავანებოთ, ნურბურგრინგის ჩრდილოური მარყუჟი 7 წუთსა და 28 წამში აქვს გავლილი, ანუ სტანდარტულ M4-ზე თითქმის 30 წამით სწრაფად.ეს 500-ცხენისძალიანი ავტომობილი ძალიან შეზღუდული რაოდენობით, მხოლოდ 700 ცალი დამზადდება. ამათგან 300 ცალი ოკეანის გაღმა გაიგზავნება, დანარჩენი კი სხვა რეგიონებს გაუნაწილდება. ფასი ჯერჯერობით არ გამოქვეყნებულა. თუმცა წინდაწინ შეიძლება ითქვას, რომ მცირე ტირაჟის გამო, ის საბაზო M4-ზე გაცილებით ძვირი ეღირება.

M4 GTS-ის კონცეპტუალური ვერსია ბავარიელებმა პირველად ახლახანს, პებლ ბიჩის ელეგანტურობის კონკურსზე წარადგინეს. კონცეპტუალური კი ერქვა, თუმცა რეალურად, ეს იყო სერიული ავტომობილი, რომელიც პრაქტიკულად არ შეცვლილა. თავისი სიმძლავრის გარდა, ის ტექნოლოგიური სიახლეებითაც გამორჩევა. ჯერ ერთი, ეს არის მსოფლიოში პირველი საგზაო ავტომობილი, რომელშიც წყლის შეფრქვევის სისტემაა გამოყენებული. და მეორეც, ეს არის მსოფლიოში პირველი ავტომობილი, რომელსაც OLED უკანა ფარები აქვს.M4 GTS-ს მამოძრავებელ ძალას 3.0-ლიტრიანი ექვსცილინდრიანი (ერთრიგა) წყვილი ტურბო კომპრესორით აღჭურვილი აგრეგატი ანიჭებს. როგორც უკვე ითქვა, ამ ძრავის მთავარი სიახლე, წყლის შეფრქვევის სისტემაა, რომელიც ბავარიულმა კომპანიამ პირველად მოტო GP-ს რბოლების უსაფრთხოების ავტომობილზე (M4-ზე) დანერგა. ეს სისტემა, შემშვებ კოლექტორში წყლის შეფრქვევას და ამგვარად, შეფრქვეული აირის მნიშვნელოვან გაგრილებას უზრუნველყოფს. ამის შედეგად, დაბლა იწევს კუმშვის ციკლის ბოლოს სამუშაო შეკუმშული აირის ტემპერატურა და წვის კამერაშიც ის მეტი მოცულობით შედის. შესაბამისად, იზრდება ძრავის სიმძლავრე.

წყვილი ტურბოს დახმარებით, S55 აგრეგატი 500 ცხენის ძალას (6 250 ბრ/წთ-ზე) და 600 ნიუტონმეტრს (4000-5000 ბრ/წთ დიაპაზონში) გამოიმუშავებს. შედარებისთვისმ სტანდარტული M4’ის სიმძლავრე 431 ცხენის ძალაა, მაქსიმალური მაბრუნი მომენტი კი – 550 ნიუტონმეტრი. ძრავთან ორქუროიანი გადაბმულობით დაკავშირებულია 7-საფეხურიანი ნახევრად ავტომატური კოლოფი. ამ წყვილის დახმარებით, ავტომობილს ადგილიდან ასის ასაკრეფად 3.8 წამი ჰყოფნის, მისი მაქსიმალური სიჩქარე კი საათში 305 კილომეტრს აღწევს.

                                                                      წყარო: ავტომანიაკი

სრულად »

ალფა რომეო თავის პირველ SUV-ს ტესტავს

”ალფა რომეოს” საქმე დაახლოებით ისეა, როგორც საფეხბურთო კლუბ ლევერკუზენის ”ბაიერის” საქმეა გერმანულ ფეხბურთში: ყველაფერი კარგად გამოიყურება, მაგრამ დიდ წარმატებებს სხვები აღწევენ. ”ალფას” წარუმატებლობის მიზეზი პირველ რიგში ალბათ ისაა, რომ იმ დროს, როცა მთელი მსოფლიო SUV-ებს ყიდულობს და ამ კლასის ავტომობილები თვით ”იაგუარმა” და ”ბენტლიმაც” კი გამოუშვეს, ”ალფას” თავისი SUV ჯერ კიდევ არ ჰყავს.

ამიტომაც გადაწყვიტეს იტალიელებმა, რომ 2016 წლიდან თავისი პირველი SUV გამოუშვან. ”ალფა რომეო” დიდი ხანია, პირველ პროტოტიპებს ტესტავს, მაგრამ აქამდე კარგად მალავდნენ, ახლა კი პაპარაცებმა აღმოაჩინეს. უცნობია თვით ავტომობილის სახელწოდებაც - გამოითქვა ვარაუდები, რომ ”ალფას” პირველ SUV-ს Alfa Romeo 949-ს დაარქმევენ, მაგრამ ეს ვარაუდი არ მართლდება.

ყველაზე საინტერესო მაინც ისაა, როგორი დიზაინი ექნება ავტომობილს - ხომ იცით, ”ალფას” შემთხვევაში ვიზუალი მართლაც ყველაზე საინტერესოა. მართალია, ფოტოებზე მანქანას ვხედავთ, მაგრამ მთავარი კითხვა მაინც უპასუხოდ რჩება, რადგან ამ ფოტოებზე არაფერი ჩანს. საქმე იმაშიცაა, რომ ამ შენიღბულ ავტომობილს რეალურად მხოლოდ ახალი ”ალფას” ტექნიკა აქვს - ტექნიკა, რომელიც Fiat 500L-ის ”სამოსითაა” შეფუთული.

თუმცა ეს ფოტოები ერთ დეტალს მაინც გვიმხელენ: ”ფიატის” ძარა (4,15 მეტრი) მნიშვნელოვნად წაუგრძელებიათ. ეს იმას ნიშნავს, რომ ავტომობილი BMW X3-ის (4,65 მეტრი) ლიგაში ითამაშებს.

ინსაიდერების ინფორმაციით, ”ალფას” პირველ SUV-ში ბევრი რამ იქნება გადმოღებული ახალი Alfa Romeo Giulia-დან. ფანები კი იმედოვნებენ, რომ ამ მანქანასაც ექნება 6-ცილინდრიანი ძრავა ორმაგი ტურბოდამბერით. საქმე ისაა, რომ ეს აგრეგატი ”ფერარის” საჯინიბოში შექმნეს და მისი სიმძლავრე 510 ცხენის ძალაა.

ახალი და პირველი SUV ”ალფა რომეოს” პირველი ნაბიჯი იქნება წარმატებისკენ. 2018 წლამდე იტალიელები ჯამში 8 ახალ მოდელს გეგმავენ და უნდათ, რომ წელიწადში მინიმუმ 400 000 ავტომობილი გაყიდონ. შედარებისთვის: 2013 წელს ”ალფამ” მხოლოდ 74 000 ახალი მოდელი გაყიდა. პრინციპში, ამაში ალოგიკური არაფერია, რადგან თუ დღეს გუნდში SUV არ გყავს, ვერანაირ თასს ვერ მოიგებ.

”ალფა რომეომ” ახალ გეგმებში 5 მილიარდი ევროს ოდენობის ინვესტიცია ჩადო. აქედან ორი მილიარდი ე.წ. Giorgio-პლატფორმის შექმნას მოხმარდა. სწორედ ამ პლატფორმაზე შეიქმნა ახალი Giulia, რომლის პრეზენტაცია იტალიელებმა ივნისში გამართეს. აღსანიშნავია, რომ კომპაქტური SUV-იც ამ პლატფორმაზე აეწყობა და 2016 წლიდან გამოვა. ”ალფას” პირველი SUV ”ფოლკსვაგენ ტიგუანის”, BMW X3-ის, Audi Q5-ისა და ამ კლასის სხვა წარმომადგენლების კონკურენტი იქნება.

                                                                        წყარო: Auto Bild Georgia

სრულად »

გაიცანით Toyota -ს ახალი სპორტქარის კონცეპტი

კომპანია Toyota -მ გამოაქვეყნა ახალი კონცეპტუალური სპორტქარის S-FR -ის ფოტოები. მისი ცოცხალი ჩვენება მოხდება ოქტომბრის ბოლოს ტოკიოს ავტოსალონში.

Toyota S-FR -ის დიზაინი შესრულებულია მსუბუქ რეტრო-სტილში. სხვა მხრივ ის მოგვაგონებს სპორტქარ Toyota GT-86 -ის დიზაინს. ახალი კონცეპტის ზომებია – 3900 მმ X 1695 მმ X 1320 მმ, ამასთან ბორბლებსშოირის ბაზა შეადგენს 2480 მმ -ს.

Toyota S-FR -ის ინტერიერი გამოირჩევა მინიმალიზმით, თუმცა მან მიიღო ციფრული ხელსაწყოთა პანელი, კლიმატ-კონტროლის სისტემა, ძრავის ამუშავების ღილაკი და მულტიფუნქციური საჭე.

ყურადღებას იპყრობს ექვსაფეხურიანი მექანიკური გადაცემათა კოლოფის ბერკეტი. toyota -ში ამ ეტაპისთვის არ ახმაურებენ თუ რა ძრავით აღიჭურვება ავტომობილი. ცნობილია მხოლოდ ის, რომ ავტომობილს “მალე ასწრაფება” შეეძლება.

არაოფიციალური მონაცემებით ახალი კონცეპტი მიიღებს 1,5 ლიტრი მოცულობის ძრავას, რომელიც გამოიმუშავებს 130 ცხენის ძალას. ასევე მოსალოდნელია, რომ Toyota -ს ეს კონცეპტი სერიულ წარმოებაში გაიშვას – სავარაუდოდ ბაზარზე 2018 წლისთვის გამოჩნდება.

                                                                           წყარო: Driver.Ge

სრულად »

როგორი იქნება ნისანის ახალი გოძილა?

”ნისანის” გრანდიოზული სპორტქარის, Nissan GT-R-ის ახალი თაობა 2018 წელს უნდა გამოვიდეს. ტოკიოს ავტოშოუზე მისი წინამორბედის, კონცეპტ 2020 Vision Gran Turismo-ს ნახვაა შესაძლებელი.

ტოკიოს ავტოშოუ 30 ოქტომბერს იწყება და 8 ნოემბრამდე გაგრძელდება. უკვე თამამად შეიძლება ითქვას, რომ ამ გამოფენის ერთ-ერთი უმთავრესი გმირი სწორედ ეს წითელი სპორტქარი იქნება, რომელსაც Concept 2020 Vision Gran Turismo ეწოდება და რომელიც გვიჩვენებს, როგორი იქნება ”ნისანის” მომავალი გოძილა - ახალი GT-R.

ერთი რამ ცხადია: R36-GT-R-ის დიზაინი უფრო დაკუთხული იქნება. ამ კონცეპტის წინამორბედი ”ნისანმა” გუდვუდში 2014 წელს, კომპიუტერული თამაშის, Gran Turismo 6-ის მოდელის რანგში გვიჩვენა. ახლა კი, იაპონიაში მის განახლებულ ვერსიას უკვე ცოცხლად ვნახავთ. აქვე ისიც უნდა ვთქვათ, რომ აქტუალური მოდელი 1,8 ტონას იწონის, რაც უკვე ძალიან ბევრია, რადგან ”მაკლარენის”, ”პორშეს” ან ”ფერარის” მარკის კონკურენტები თითქმის 400 კილოგრამით ნაკლებს იწონიან.

GT-R-ის ფანებს მოცდა 2018 წლამდე მოუწევთ, თუმცა სანამ ახალი თაობა გამოვა და ”პორშეებს” შეუტევს, მანამდე იაპონელებს აქტუალური მოდელის ტექნიკური განახლება აქვთ დაგეგმილი. საქმე ისაა, რომ ”ნისანი” R35-ისთვის ჯერ კიდევ ხედავს გაუმჯობესების პოტენციალს.

                                                                    წყარო: Auto Bild Georgia

სრულად »

როგორი იქნება ახალი Opel Insignia?

”ოპელი” გვპირდება, რომ Insignia-ს ახალი, მეორე თაობა უფრო ტევადი იქნება და უფრო სპორტული ვიზუალი ექნება. აი, როგორ აპირებს ”ოპელი” გერმანული პრემიუმ-ბრენდების, ”აუდის”, BMW-ს და ”მერსედესის” წინააღმდეგ გალაშქრებას.

”ოპელში” მეორე თაობის Insignia-ზე დიდი მონდომებით მუშაობენ. რიუსელსჰაიმელთა საშუალო კლასის სედანი 2017 წლის მარტში უნდა გამოვიდეს. ახალი Insignia-ს დიზაინი სტუდიური მოდელის, Opel Monza-ს დიზაინზე იქნება ორიენტირებული - განსაკუთრებით სახურავი და უკანა ტანი გამოიყურება უფრო სპორტულად, ვიდრე აქტუალური მოდელისა.

”ასტრასგან” განსხვავებით, ახალი Insignia წინამორბედზე დიდი იქნება - სიგრძეში დაახლოებით 15 სანტიმეტრით მეტი. ”ოპელის” მიზანი პირველ რიგში ინტერიერში სივრცის მატებაა, რათა Skoda Superb-ს კონკურენცია გაუწიოს. საინტერესო ის გახლავთ, რომ მიუხედავად ზომის მატებისა, წონა იკლებს. ახალი პლატფორმის დამსახურებით, ახალი Insignia აქტუალურ მოდელზე დაახლოებით 200 კილოგრამით ნაკლები იქნება.

მეორე თაობის Insignia-ში ნახავთ სრულიად ახალ მომსახურების სისტემას სენსორული ეკრანებით და ციფრული ინსტრუმენტებით. ჩამრთველებისა და ღილაკების რაოდენობა კი მინიმუმამდე იქნება შემცირებული. გარდა ამისა, რიუსელსჰაიმელები პირობას დებენ, რომ სალონში გამოყენებული მასალებიც გაცილებით უკეთესი ხარისხის იქნება. ახალ Insignia-ში სერიული იქნება ახალი მულტიმედიური სისტემა OnStar.

                                                                წყარო: Auto Bild Georgia

სრულად »

ახალი Toyota Prius: ეკონომია ჰო, მაგრამ...

ახალი ”პრიუსი” ისე გამოიყურება, თითქოს მისმა დიზაინერებმა ბნელ სარდაფში იმუშავეს. არა, ამას AUTO BILD კი არ ამბობს, არამედ ამას ერთ-ერთი მკითხველი წერს - მიხაელ ბ. ვუპერტალიდან. ძვირფასო მიხა, წამოდი ერთად დავლიოთ!

და თან, დალევისას ვისაუბროთ... ჰმ... საინტერესო დიზაინზე კი არა, არამედ ახალი ”პრიუსის” შინაგან თვისებებზე. გარეგნობას თავი რომ დავანებოთ, ”ტოიოტამ” მეოთხე თაობის ”პრიუსზე” ძალიან გულმოდგინედ იმუშავა. ნაცნობი ჰიბრიდული სისტემა, რომელიც შიდაწვის 4-ცილინდრიანი ძრავისგან და ელექტრომოტორისგან შედგება, უფრო მსუბუქია. ელემენტები კი მეტ სიმძავრეს გვთავაზობენ. რეზულტატი: ისედაც ძალიან ეკონომიური მანქანა კიდევ უფრო ეკონომიური გახდა.


     მძღოლის სამუშაო მაგიდაზე ისევ იგრძნობა სივრცე, მაგრამ ნაკლებად პრაქტიკულია

AUTO BILD-მა აქტუალური ”პრიუსი” რომ გატესტა, საშუალო ხარჯი 100 კილომეტრზე 3,2 ლიტრი გახლდათ. ახალი ”პრიუსის” საშუალო ხარჯი კი, დიდი ალბათობით, 3 ლიტრზე ნაკლები იქნება. ჰო, გასაგებია, რომ მართვის სიამოვნებაზე ლაპარაკი ზედმეტი იყო, მაგრამ სამაგიეროდ, საწვავის ჩასხმისას მიიღებ უდიდეს სიამოვნებას. აი, ახალი ”პრიუსის” შემთხვევაში კი ეს ყველაფერი კიდევ უფრო უკეთესი უნდა იყოს. მაგალითად, ”ტოიოტა” გვპირდება, რომ აჩქარებისას შიდაწვის ძრავის წყევლა-კრულვა წარსულს ჩაბარდა. თუმცა ამას მხოლოდ მას მერე დავიჯერებთ, როცა მარტში ახალ ”პრიუსს” გავტესტავთ. ახლა კი მხოლოდ იმის თქმა შეგვიძლია, რომ ინტერიერის ხარისხი გაცილებით გაუმჯობესებულია. ნაკლები იაფფასიანი პლასტმასი და მეტი ძვირფასი მასალები. აი, სად ჩანს პროგრესი.

     ბერკეტი წინამორბედშიც ასე იყო. მარჯვენა ღილაკი ელექტროსვლისთვის

...და კიდევ, ძვირფასო მიხაელ ვუპერტალიდან, რაც შეეხება დაიზაინს. გინდ ასე შეხედე, გინდ - ისე: განსხვავებული ნამდვილად არის. და, შესაძლოა, ეს მანქანა სულაც არ უნდა მოგეწონოთ ვუპერტალელებს, თუკი ამერიკელებს მოეწონებათ.

დასკვნა
ვისაც ”პრიუსი” უყვარდება, ღამღამობით ალბათ ექსელის ცხრილები ესიზმრება. სამაგიეროდ, ახალი ”პრიუსის” საწვავის ხარჯი 3,5 ლიტრზე ნაკლები იქნება და, რაც ასევე მნიშვნელოვანია, მანქანა არასდროს გაფუჭდება. სხვამხრივ კი, შესაძლოა, ზედმეტად სულელი ვარ, თან პროვინციელიც გახლავართ, მაგრამ ”ტოიოტას” ახალი დიზაინი არ მესმის. არ მესმის და რა ვქნა.
ანდრეას მაი

     აი, ასეთი იქნება ახალი ”ტოიოტა პრიუსი” - კიდევ უფრო ეკონომიური უცნაური დიზაინით

                                                             წყარო: Auto Bild Georgia

სრულად »

G-კლასი მეტი სიმძლავრით და მეტი კომფორტით

”გელენდევაგენის” მოყვარულებო, სწორდი, სმენა: Mercedes G-კლასი ამიერიდან AMG-GT-ს ბაზაზე აწყობილი 422-ცხენისძალიანი V8 ძრავით ირბენს. ჩვენ სწორედ G 500-ით ვიარეთ - გზაზეც და, რა თქმა უნდა, უგზოობაზეც

მთელი მსოფლიო რომ შეიცვალოს, G-კლასი მაინც არ შეიცვლება და რა გასაკვირია, რომ ”მერსედესის” ფეისლიფტიც თითქმის არაფერს ცვლის. თითქმის, რადგან ფეისლიფტში მხოლოდ მცირეოდენი მოდიფიკაცია შედის და G-ც ოდნავ უფრო აგრესიულად გამოიყურება, რაც უხდება კიდეც.



მთავარი ცვლილება კი კაპოტის ქვეშ მოხდა და ასევე AMG-სგან მოდის: ეს გახლავთ 4-ლიტრიანი V8 ძრავა, რომელიც AMG-GT-ს ბაზაზე დამუშავდა და ახლა უკვე G 500-შიც გუგნებს. ჰო, ეს არ არის ერთი-ერთზე გადმოღებული ვარიანტი, რადგან G-კლასით არც არავინ იდრიფტავებს და არც სარბოლო ტრეკზე შევა. თუმცა ძრავის ძირითადი პრინციპი ორ ტურბოდამბერთან ერთად შენარჩუნებულია. ამ აგრეგატით აღჭურვილ G 500-ს 422 ცხენის ძალა და 610-ნიუტონმეტრიანი ბრუნის მომენტი აქვს. ამიტომაცაა, რომ ავტომობილი მაშინაც გრიალებს, როცა დგას და გვერდებზე წყვილი მაყუჩები შესაბამის ხმასაც გამოსცემენ.

”მერსედესმა” G 500-ის სავალ ნაწილზეც წაიმუშავა და იზრუნა იმისათვის, რომ მოსახვევებში უკეთესად შევიდეს. და მართლაც: 130 კმ/სთ-ზე მეტი სისწრაფისას და განსაკუთრებით კი მოსახვევებში, პროგრესი აშკარაა. ახალი G მკვეთრ მანევრებზე საგრძნოვლად უკეთესად რეაგირებს, ვიდრე მისი წინამორბედი. ”მერსედესმა” ესეც არ იკმარა და G 500 ოფციურად ადაპტირებადი სავალ ნაწილიც უსახსოვრა, რაც ფასიანი სიამოვნებაა და 1400 ევრო ღირს.





ცენტრალურ კონსოლზე მოთავსებული ღილაკის მეშვეობით მძღოლს შეუძლია აირჩიოს სვლის სპორტული ან კომფორტული რეჟიმი. სპორტულ რეჟიმში ამორტიზაცია ხისტდება, რაც ავტომობილის უფრო სწრაფ და უკეთეს უკურეაქციას იწვევს და, შესაბამისად, G მოსახვევებს საგრძნობლად უკეთესად ყლაპავს. ვინ უნდა ირბოლოს 2,6-ტონიანი ყუთით? მართალია, ამას მხოლოდ ერთეულები თუ გააკეთებენ და ისიც მხოლოდ გართობის მიზნით, მაგრამ ფაქტია, რომ V8 ძრავის მეშვეობით ”G-კლასი” 100 კმ/სთ-მდე 5,9 წამში ჩქარდება. მაგრამ თუ ამ მანქანას ასე ხშირად ააჩქარებთ, არც ის უნდა გაგიკვირდეთ, რომ საწვავის ხარჯი ”მერსედესის” დაპირებას (საშუალოდ 12,3 ლიტრი 100 კმ-ზე) მნიშვნელოვლად გადასცდება.

თუმცა G-კლასი პირველ რიგში თავისი გამავლობით გამოირჩევა და ამ მხრივ ტრადიციებს, რა თქმა უნდა, არ ღალატობს - მისი სტიქია პირველ რიგში სერიოზული უგზოობაა. დიფერენციალის ბლოკირებებით G-კლასი ასფალტს მიღმა ნამდვილი მეფეა. როგორც წესი, უგზოობაზე უკანა ხიდის დიფერენციალის ბლოკირებაც კი საკმარისია ხოლმე, მაგრამ თუ ექსტრემალური ოფროუდია, მაშინ წინა ხიდის დიფერენციალის ბლოკირებაც შესაძლებელია.



G 500, რომელიც დაახლოებით 100 000 ევრო ღირს, გამორჩეულ გამავლობასთან ერთად კლასში ერთ-ერთ საუკეთესო კომფორტსაც გვთავაზობს. ტყავის სავარძლები კლიმატიზაციით, ბევრი ქრომი, ალკანტარა და ერთი სიტყვით, ბევრი ლუქსი სალონში. ოფროუდის შარმი შერჩენილია კარსა და მხარს შორის დარჩენილ მცირე სივრცეში. განახლებულ კოკპიტზე 11,4-სანტიმეტრიანი მულტიფუნქციური ეკრანია და ”სამუშაო მაგიდაზე” ახალ მაჩვენებლებსა და ციფერბლატებს შეხვდებით. ამაზე მეტი პრინციპში საჭირო არცაა.



                                                                     დასკვნა
36 წელია, რაც G-კლასი სანდო და გამორჩეული ოფროუდერია. ავტომობილმა ამ ტრადიციას არც ფეისლიფტის შემდეგ უღალატა. სამაგიეროდ, გზაზე უფრო კომფორტული გახდა, რაც გაუმჯობესებული სავალი ნაწილის დამსახურებაა. AMG-GT-ს ბაზაზე შექმნილი V8 ძრავით 2,6-ტონიანი მანქანა სპრტქარად, რა თქმა უნდა, არ გადაიქცა, მაგრამ უფრო სწრაფი კი ნამდვილად გახდა.
რობინ ჰორნიგი

                                                                წყარო : Auto Bild Georgia

სრულად »

ასე მუშაობენ გარბენის ჩამომყრელები

AUTO BILD გარბენის ჩამომყრელს კლიენტის სტატუსითა და ფარული კამერით ესტუმრა 

ჩვენი რედაქციის Mercedes C-კლასით კიოლნის ერთ-ერთ ცენტრალურ უბანში, ვაიდენში, მთავარ ქუჩაზე გავჩერდი. აქ ცხოვრება დუღს – ქუჩაში ბევრი ხალხია, მანქანების მოძრაობა არ წყდება და აბსოლუტურად ვერავინ წარმოიდგენს იმას, რომ სულ ცოტა ხანში აქ, პირდაპირ ბორდიურზე, სადაც ხალხი ფეხით დადის, დანაშაული მოხდება. უბრალო კი არა, სერიოზულ დანაშაულს ვგულისხმობთ, რისთვისაც კანონი თავისუფლების ერთი წლით აღკვეთას ითვალისწინებს: ამ ავტომობილის გარბენი მინდა ჩამოვაყრევინო.

რაკი პოლიციამ შემაშფოთებელი სტატისტიკა გამოაქვეყნა იმის შესახებ, რომ გერმანიაში ყოველი მესამე მეორადი ავტომობილი ჩამოყრილი გარბენით იყიდება, AUTO BILD-ში გადავწყვიტეთ, შევამოწმოთ, რამდენად მარტივად ხდება გარბენის ჩამოყრა. ჩვენი C-კლასი კი ამისათვის სწორედ რომ ზედგამოჭრილია: ამ მანქანამ ბოლო ოთხ წელიწადში 225 000 კილომეტრი გაიარა და მიუხედავად ამისა, გარეგნულად ძალიან კარგად, ახალივით გამოიყურება. მინდა, რომ 140 000 კილომეტრი ჩამოყარონ, მერე კი მანქანას კარგ სპეციალისტს მივუყვან – მაინტერესებს, შეამჩნევს თუ არა, რომ კილომეტრაჟი თითქმის ორი მესამედითაა მანიპულირებული.

ანდრეასს (სახელი შეცვლილია რედაქციის მიერ), რა თქმა უნდა, ინტერნეტში მივაგენით. ვებ-გვერდზე მას ტახომეტრის შეკეთებისა და ჩიპტიუნინგის სერვისი ჰქონდა შემოთავაზებული. ანდრეასთან ერთი ზარიც საკმარისი აღმოჩნდა იმისათვის, რომ დავრწმუნებულიყავით, გარბენის ჩამოყრაც რომ შეეძლო. მერე, ტექსტური შეტყობინებით მისამართი გამოგვიგზავნა – ჰამბურგიდან კიოლნში გავხდით წასასვლელები.

"ხალხი ფიქრობს, რომ გარბენების ჩამოყრა საიდუმლო ეზოებში, ხელით შეკოწიწებული აპარატებით ხდება ხოლმე. არადა, ასე არ არის: დამნაშავეები პროფესიონალურად მუშაობენ და გარბენის ჩამოყრისთვის ლეპტოპებს იყენებენ,“ - აცხადებს მიუნხენის კრიმინალისტიკური პოლიციის გამოძიების განყოფილების უფროსი ალექსანდერ ჰარტინგერი.

მართლაც: ანდრეასი პირდაპირ ქუჩაში შეგვხვდა და გარბენის ჩამოყრასაც ბორდიურზე შეუდგა. მისი აჭღურვილობა: უახლესი ლეპტოპი და თანამედროვე აპარატი სენსორული ეკრანით. რამდენიმე წლის წინათ ეს ერთ-ერთი ყველაზე ძვირადღირებული აპარატი იყო – 14 000 ევრო ღირდა. მიუხედავად ამისა, მაინც კარგად იყიდებოდა და თანაც, აბსოლუტურად ლეგალურად, რადგან ამ აპარატის ქონა აკრძალული არ არის.

   ესეც გარბენის ჩამომყრელი აპარატი

„ამ აპარატით მანიპულატორები ძალიან ბევრ ფულს შოულობენ, - ამბობს ჰარტინგერი – ერთი მანიპულატორი საშუალოდ დღეში სამ ავტომობილს უყრის გარბენს, რაც იმას ნიშნავს, რომ თვეში დაახლოებით 10 000 ევროს შოულობს. გამოდის, რომ ინვესტირებული 14 000 ევრო თვენახევარში ამოღებულია, მერე კი მოგებაზე მიდიხარ.“

ჰარტინგერის გამოცდილებით, ტაქსისა და ავტომობილების გაქირავების კომპანიები ხშირად სხვა მეთოდს მიმართავენ: ისინი იყენებენ ე.წ. „კილომეტრ-ფილტრს“, გაცილებით იაფ საშუალებას, რომელიც ელექტროობაში ერთვება და კილომეტრაჟს ასევე უპრობლემოდ ყრის, უბრალოდ, შედარებით მეტი დრო ჭირდება, ვიდრე ამ აპარატს.

ანდრეასმა თავისი კომპიუტერი ჩვენი „მერსედესის“ მძღოლის ფეხების განყოფილებაში, ერთ-ერთ შესაერთებელში მიაერთა, მერე სასურველი გარბენი ჩაწერა და რამდენიმე წუთი დაელოდა.

„ჰამბურგიდან ჩამოხვედი, არა? – მეკითხება გაღიმებული სახით, - გრძელი გზა გამოგივლია. ისე, ცოტა ხნის წინ ერთი კლიენტი მყავდა, „სმარტით“ ბერლინიდან ჩამოვიდა. სხვათა შორის, რატომ გინდა გარბენის ჩამოყრა? მანქანას ყიდი? ჯობია, უცხოეთში გაყიდო, თორემ აქ შეიძლება მიხვდნენ, რომ ჩამოყრილია...“ - ამ დროს კომპიუტერმა დაიწრიპინა, ტახომეტრმა კი სასურველი კილომეტრაჟი აჩვენა: 84 739. ანდრეასი კმაყოფილია: „ესეც ასე!“

ანდრეასმა გვითხრა, რომ „მერსედესის“ შემთხვევაში სიფრთხილეა საჭირო, რადგან Software-Update-ის შემთხვევაში, შეიძლება, ძველი გარბენი დაბრუნდეს, რადგან ორიგინალი კილომეტრაჟი C-კლასის მეხსიერებაში მაინც ინახება. ანდრეასმა ამისათვის 100 ევრო გამოგვართვა – სხვა მანქანა რომ გვყოლოდა და ძველი გარბენის დაბრუნების საფრთხე რომ არ ყოფილიყო, 500 ევროს აიღებდა.

ანდრეასი მხოლოდ და მხოლოდ პატარა თევზია, მანიპულატორები კი ხშირად მაფიოზურ სტრუქტურებს ქმნიან. მიუნხენის პოლიციამ მარტში მეორადი ავტომობილების 150 დილერი შეამოწმა და 26-ში დარღვევების კასკადი აღმოაჩინა. ჰარტინგერის თქმით, მარტო მარტში 200 გარბენ-ჩამოყრილი მანქანა და ერთი მილიონი ევრო აღმოაჩინეს. მიუნხენში აღმოჩენილი დანაშაულების ფესვების ნაწილი ავსტრიაში, ნაწილი ბულგარეთში, ნაწილი და შვეიცარიაშია. გარბენს ყრიან როგორც უბრალო ავტომობილებში, მაგალითად Volkswagen Golf-ში, ისე ძვირადღირებულ მანქანებში, როგორებიცაა „მერსედესი“, „პორშე“ და ა.შ. იმის გამო, რომ გარბენის ჩამოყრა ძალიან მარტივად ხდება, კონტროლი და დანაშაულის აღკვეთა ფაქტობრივად შეუძლებელია.

   ეს შედარებით იაფფასიანი ჩამომყრელია, ე.წ. "კილომეტრების ფილტრი" 

200 გარბენჩამოყრილი მანქანის შემთხვევაში, მიუნხენის პოლიციამ საშუალოდ ერთ ავტომობილზე ფასის 3 400-ევროიანი ნაძალადევი ნამატი დააფიქსირა. სტატისტიკის მიხედვით, გერმანიაში წელიწადში ჩამოყრილი გარბენით 2 მილიონი ავტომობილი იყიდება. შედეგად ცხადი ხდება, რომ მყიდველები წელიწადში დაახლოებით 6.8 მილიარდი ევროთი მეტს იხდიან...

დავბრუნდით ჰამბურგში და გარბენჩამოყრილი „C-კლასი“ ექსპერტ ტორსტენ ქენბლის მივუყვანეთ. შეგახსენებთ, რომ მანქანის რეალური გარბენი 225 000 კილომეტრია, ახლა კი, ტახომეტრი 84 739 კილომეტრს გვიჩვენებს. ტორსტენი ჯერ სალონს ამოწმებს, მერე კი კაპოტქვეშ დეტალებს აკვირდება.

„მჯერა, რომ ამ მანქანას დაახლოებით 100 000 კილომეტრი აქვს გავლილი. საჭესა და სატერფულებზე ტიპიური ცვეთაა,“ - გვეუბნება ტორსტენი...

მოკლედ, ამ მანქანის გაყიდვა რომ მინდოდეს, კარგ ფულს ვიშოვნიდი. რეალური გარბენით ამ „C-კლასს“ 5 000 ევროდ შემიფასებდნენ, მანიპულაციის შემდეგ კი მისმა ფასმა 4 000 ევროთი მოიმატა. მეორე დღეს ანდრეასს კიდევ ერთხელ დავუკავშირდით და შეხვედრა ვთხოვეთ – პირდაღებული გვიყურებდა, როცა მეორე 100 ევრო იმაში გადავუხადეთ, რომ გარბენი ისევ 225 000 კილომეტრზე დაგვებრუნებინა...

                                                                               დასკვნა
გარბენის ჩამოყრა მასობრივი ფენომენი გახდა – მიუხედავად იმისა, რომ ამ დანაშაულზე სასჯელი სერიოზულია. ცხადია, კარგია, როცა ახალი ავტომობილი იმდენად ხარისხიანია, რომ ჩამოყრილი გარბენის შემჩნევა ჭირს, მაგრამ მთავარი დამნაშავეები ავტომწარმოებლები არიან, რომლებიც არაფერს აკეთებენ იმისათვის, რომ გარბენის ჩამოყრა ასეთი მარტივი არ იყოს. ისინი თანამედროვე მანქანებში მოძველებულ ტექნიკას იყენებენ – მხოლოდ იმიტომ, რომ ახალი ტექნიკის შექმნა ძვირი ჯდება. მსხვერპლი კი ამ შემთხვევაში მეორადი ავტომობილის მყიდველი გამოდის.
შტეფან ფოსვინკელი

ასე მუშაობენ ჩამომყრელები

  კრიმინალები თავიანთ მომსახურებას ინტერნეტში გვთავაზობენ. ამ „პასატს“ ჯერ თითქმის 100 000 კილომეტრი აქვს გავლილი

კომპიუტერი ერთდება OBD-შტეკერში. აპარატი იცნობს ავტომობილს

ზემოთ მოცემულია რეალური გარბენი, ქვემოთ წერენ სასურველს და მზადაა: ავტომობილის გარბენი ჩამოყრილია!

როგორ დავიცვათ თავი?

„კარგი ფასადი უცოდველობის გარანტია არ არის!“

მანფრედ გროსი, ADAC-ს ტექნიკის ცენტრი

- ჰერ გროს, გარბენს სერიოზული დილერებიც ყრიან?
- გარბენის ჩამოყრა დღეს ძალიან ადვილია და 30 წამში ხდება. სწორედ ამის ბრალია ის, რომ მეორადი ავტომობილების თითქმის ყველა დილერს შეუძლია მანიპულირება. ამას სერიოზული დილერებიც აკეთებენ. ასე რომ, დილერის შოურუმის კარგი ფასადი უცოდველობის გარანტია არ არის.
- ყველაზე ხშირად რომელ მოდელებზე ხდება მანიპულირება?
- ჩვენ ვფიქრობთ, რომ ეს უკვე ყველა მარკას და ყველა მოდელს თანაბრად ეხება.
- როგორ უნდა დაიცვას თავი მყიდველმა?
- თავად მანიპულაცია კვალს თითქმის არასდროს ტოვებს. თავის დაცვა კი ძალიან ძნელი, ფაქტობრივად შეუძლებელია, მაგრამ მაინც არსებობს გზები. მაგალითად, შეიძლება კაპოტქვეშ წააწყდეთ ერთ დროს ზეთის გამოცვლის დროს მიწებებულ სტიკერს, სადაც რეალურ გარბენს ამოიკითხავთ, ან ავტომობილის შეკეთების ქვითარს. როგორც წესი, ასეთ დროს გამყიდველები სერვის-წიგნებს არასდროს აჩენენ ხოლმე, ანაც, ამ წიგნის ყიდვა ისედაც შეიძლება – ინტერნეტში ხომ ყველა მოდელის წიგნი იყიდება. მოკლედ, თუ რამეს წააწყდებით, ხომ კარგი, თუ არა ვერაფერს მიხვდებით.

ექსპერტიც ვერაფერს მიხვდა

AUTO BILD-ის თხოვნით, ჩვენი Mercedes C 180 Kompressor ექსპერტმა ტორსტენ ქენბლიმ დეტალურად შეამოწმა. მას ჩვენთვის უნდა ეთქვა, რამდენად დამაჯერებელია, რომ ამ ავტომობილს თითქმის 85 000 კილომეტრი აქვს გავლილი. სალონში საჭე, გადაცემათა კოლოფის ბერკეტი და სატერფულების რეზინები შეამოწმა. ასევე სავარძლები და კარების რეზინები, რადგან ავტომობილს მოხმარების დონე პირველ რიგში ამ დეტალებზე ეტყობა ხოლმე. კაპოტქვეშ დათვალიერებისას კი ექსპერტი ცოტათი დაეჭვდა, მაგრამ მერე ეჭვი თვითონვე გააბათილა – დანალექები შესაძლოა იმის ბრალი იყოს, რომ მანქანა ზამთარში, თოვლში ხშირად დადიოდა ავტობანზეო. საბოლოო ჯამში მას მცირე ეჭვი მხოლოდ მაყუჩის კოროზიულმა ადგილებმა გაუჩინა. დასკვნა: ექსპერტმა მანიპულაციის სერიოზული კვალი ვერ აღმოაჩინა.

დიდი გარბენის დროს გადაცემათა კოლოფის ბერკეტი გაცვეთილია ხოლმე. თუ ზეთის შეცვლის სტიკერს აღმოაჩენთ, გაგიმართლათ

ცვეთა საჭესაც უნდა ეტყობოდეს, მაგრამ თანამედროვე ავტომობილებში აღარც საჭე იცვითება. უნდა დააკვირდეთ კარის რეზინებსაც

კოროზია შეიძლება ზამთარში ბევრმა სიარულმაც გამოიწვიოს. დააკვირდით ცენტრალურ კონსოლსაც

                                                              წყარო: Auto Bild Georgia

სრულად »