Ferrari FXX-ის სულ 30 ეგზემპლარი გამოვიდა და ეს, რიგით 29-ე, მიხაელ შუმახერის ავტოგრაფით, ბერლინში, აუქციონზე იყიდება. სავარაუდო ფასი 2,2 მილიონი ევროა.
2005/2006 წლებში ”ფერარიმ” Enzo-ს ბაზაზე სუპერსპორტული FXX გამოუშვა - 800 ცხენის ძალით, 6,3-ლიტრიანი, 12-ცილინდრიანი ძრავით და ფორმულა 1-ის ტრანსმისიით. რაც ყველაზე საინტერესოა, ამ მოდელის შექმნაში თვით მიხაელ შუმახერმაც მიიღო მონაწილეობა.
შესაბამისად, ეს მართლაც სუპერექსკლუზიური მოდელი ლიმიტირებული ტირაჟით გამოვიდა და მისი შეძენის უფლება მხოლოდ VIP-კლიენტებს მიეცათ, ფასი კი 1,5 მილიონი ევრო იყო. და ”იმ ბედნიერებს” ამ ექსტრემალური ბოლიდით გართობა მხოლოდ ტრეკზე შეეძლოთ.
ახლა კი, ერთ-ერთი ეგზემპლარი, 30-დან რიგით 29-ე მოდელი ბერლინში, Auctionata-ს აუქციონზე იყიდება. აუქციონზე განაცხადის შეტანა 26 სექტემბრის 18 საათამდეა შესაძლებელი - წერილობით, ტელეფონით ან ინტერნეტით. თუ, რა თქმა უნდა, ბევრი ფული გაქვთ. მინიმალური შეთავაზება ამ დროისთვის 1 მილიონი ევროა, სავარაუდო საბოლოო ფასი კი - 2,2 მილიონი ევრო.
თუმცა თუ ფული გაქვთ, ეს სუპერქარი ამად ნამდვილად ღირს, რადგან მართლაც განსაკუთრებული ეგზემპლარია. არა მარტო იმიტომ, რომ განუმეორებელი მონაცემებით გამოირჩევა და, მაგალითად, 100 კმ/სთ-მდე 2,9 წამში ჩქარდება, მაქსიმალური სიჩქარე კი 345 კმ/სთ-ია, არამედ იმის გამოც, რომ რიგით 29-ე ეგზემპლარი ბოლოა მათ შორის, რაც გაიყიდა. საქმე ისაა, რომ 30-ე მოდელი სპეციალურად მიხაელ შუმახერისთვის შეიქმნა! ამიტომაცაა, რომ ამ, 29-ე ეგზემპლარს კაპოტზე თავად შუმის ხელმოწერა ამშვენებს.
მიუხედავად იმისა, რომ ავტომობილი თითქმის 10 წლისაა, მხოლოდ 2400 კილომეტრი აქვს გავლილი, რაც იმას ნიშნავს, რომ ჯერ კიდევ ახალია! Auctionata-ს ინფორმაციით, Ferrari FXX 29/30 მხოლოდ მონცაზე, ფიორანოსა და ნიურბურგრინგზე დადიოდა, ყველაზე ხშირად კი მას DTM-ის პილოტი მაქსიმილიან გიოტცი მართავდა. ეს მოდელი 2007 წელს ერთ-ერთმა კოლექციონერმა იყიდა და ახლა ისევ ყიდის.
წყარო: Auto Bild Georgia
