ინფორმაციამ, რომელიც გერმანულმა AUTO BILD-მა ექსკლუზიურად გაავრცელა, მთელი საავტომობილო სამყარო დააინტრიგა: ”ოპელმა” ლეგენდარული Opel GT-ს ახალი ვერსიის გამოშვება გადაწყვიტა! ამ სიახლის პირველ სტუდიურ ვერსიას 2016 წელს, ჟენევის ავტოშოუზე ვიხილავთ, მანამდე კი თქვენ წინაშეა AUTO BILD-ის ექსკლუზიური ილუსტრაცია, რომელზეც ხედავთ, თუ როგორი იქნება ”ოპელის” ახალი გმირი.
ავტომობილი ახალი Astra-ს ბაზაზე აეწყობა, წინა მხარე კი სტუდიური მოდელის, Opel Monza-ს სტილში გადაწყდება. ახალ ვერსიაში კლასიკური Opel GT-ს დიზაინსაც ამოიცნობთ. ახალი GT-ს სერიული წარმოება, სავარაუდოდ, 2018 წელს დაიწყება და ამ ავტომობილის საწყისი ფასი მაქსიმუმ 25 000 ევრო იქნება.
შეგახსენებთ, რომ სულ რაღაც ხუთი წლის წინათ ”ოპელს” სერიოზული კრიზისი ჰქონდა და მარკის გაყიდვაც კი იგეგმებოდა. არადა, ეს ბრენდი საავტომობილო გერმანიის ერთ-ერთი სიამაყეა. თუმცა მერე, ”ოპელის” მფლობელმა ამერიკულმა კონცერნმა General Motors-მა შეიგნო, რომ ”ოპელი” მისთვისაც უმნიშვნელოვანესი ბრენდია, ევროპაში ამ ბრენდის პოზიციონირება გააძლიერა და გერმანულ მარკაში მილიარდობით ახალი ინვესტიციაც ჩაიდო.
მას მერე ”ოპელის” საქმეები წინ წავიდა. რიუსელსჰაიმელებმა Insignia-ს და წინა თაობის Astra-ს წარმატებების შემდეგ კიდევ გამოუშვეს წარმატებული მოდელები - ამ ბრენდის ბოლოდროინდელი პროგრესი პირველ რიგში კომპაქტური ქროსოვერის, Opel Mokka-ს და ქალაქის სახალისო ავტომობილის, Opel Adam-ის დამსახურებაა. ახლა კი გერმანელები ამ ტენდენციის გასაგრძელებლად მორიგ სიახლეებს გეგმავენ და სწორედ ამ გეგმის ნაწილია ახალი Opel GT. გარდა ამისა, ახლახან გამოვიდა ახალი Opel Astra, მალე გამოდის მეორე თაობის Insignia. გეგმაშია უდიდესი ტრადიციების სახელის მქონე მოდელის, Opel Monza-ს გამოშვებაც.
წყარო: Auto Bild Georgia
