6-ცილინდრიანი 370 ცხენის ძალით და უკანა ამძრაობა - აი, ასეთი იქნება BMW M2 , რომელიც 2016 წლის აპრილიდან გაიყიდება
ბავარიული მარკის ფანები ამ ავტომობილს დიდხანს ელოდნენ და აი, BMW-მ, როგორც იქნა, წარმოადგინა M2 და მისი ოფიციალური მონაცემები. 370 ცხენის ძალა და 465-ნიუტონმეტრიანი ბრუნის მომენტი პირველი და ყველაზე მთავარი მონაცემებია. სპორტული კომპაქტის ძრავა 3-ლიტრიანი და 6-ცილინდრიანია. Overboost-ის წყალობით, მისი პილოტების განკარგულებაში მცირე ხნით 500-ნიუტონმეტრიანი ბრუნის მომენტიც იქნება.
M-ის ოფციური ორდისკიანი ტრანსმისიით M2 100 კმ/სთ-მდე 4,3 წამში აჩქარდება. მაქსიმუმი კი 250 ან 270 კმ/სთ-ია - გააჩნია პაკეტს. M2-ს, რა თქმა უნდა, ვიზუალურადაც მაშინვე იცნობთ: დიდი საჰაეროები, 4 მაყუჩი, ექსკლუზიური 19-დუიმიანი დისკები და ა.შ. მანქანამ M3-ისა და M4-ის წინა და უკანა ღერძები მიიღო.
კარგი ამბავი ის არის, რომ BMW M2 არ იქნება ლიმიტირებული, ცუდი კი ის, რომ ეს ავტომობილი მინიმუმ 55 000 ევრო ეღირება. გაყიდვები 2016 წლის აპრილში იწყება.
წყარო: Auto Bild Georgia
